[Descarga aquí este documento]

ADIANTE (Mocidade Revolucionaria Galega) somos unha organización xuvenil galega, autónoma e asemblearia, que abrangue a diversidade de problemáticas da mocidade galega desde unha perspectiva de liberación nacional e social, tendo como horizonte estratéxico a construción dunha República Galega independente e socialista.

Comezamos a fragoar o que sería ADIANTE (Mocidade Revolucionaria Galega) cunha xeira de asembleas abertas iniciadas na véspera do Día da Patria Galega de 2003 (descarga aquí o Manifesto Fundacional) a partir dun grupo inicial de mozas e mozos independentistas e revolucionari@s procedentes de distintas estruturas (de base, políticas, sindicais, culturais...) e formad@s en recentes loitas (anti-LOU, Prestige, anti-guerra...) ás/aos que se foron sumando máis xovens até a nosa Asemblea Nacional Constituínte (ANC) celebrada en Compostela o 9 de Outubro de 2004 baixo o lema O FUTURO É NOSO (descarga aquí os Relatorios da ANC).

Facemos parte do Movemento Nacional-Popular Galego (MN-PG) xunto con outras organizacións (partidos, sindicatos, asociacións…) con similares obxectivos aos nosos.

POR QUE LOITAMOS?

A orientación estratéxica de ADIANTE (Mocidade Revolucionaria Galega) guíase seguindo os seguintes principios:

Loitamos pola independencia nacional

Galiza é unha nación cunha lingua, cunha cultura, cunha historia e cun territorio propios, e como tal aspira e ten dereito á súa Autodeterminación. Loitamos por gobernar nós a nosa Terra no marco dunha República Galega independente, soberana, democrática e popular, na que o poder estea ostentado pola clase traballadora e o territorio nacional non se reduza ás vixentes fronteiras autonómicas nin o seu artellamento interior se faga en base ás provincias actuais.

Pola contra, promovemos unha organización territorial acorde coas comarcas históricas e coa realidade socioeconómica de cada unha delas, e defendemos a reintegración en Galiza dos territorios estremeiros con Asturias (comarca do Eo-Navia e máis a do Val do Ibias), coa provincia de León (O Berzo e máis A Cabreira) e coa provincia de Zamora (comarca da Seabra), por seren de sempre parte integrante da cultura e da historia de Galiza.

Loitamos polo socialismo e o traballo

Frente aos que anuncian a fin da historia ADIANTE (Mocidade Revolucionaria Galega) reivindica a plena vixencia dos ideais de esquerdas. Afirmamos que estas ideas que defenderon e desenvolveron MARX, ENGELS, LENIN, CHE GUEVARA, MONCHO REBOIRAS... seguen a ser válidas e máis necesarias do que nunca. Son unha ferramenta imprescindíbel para comprender a nosa realidade e o que é máis importante: indícannos como poder transformala.

Temos o convencemento de que este novo movemento que estamos a erguer se ten que sustentar non en ideas abstractas e moito menos en "infantilismos esquerdistas" senon en toda a experiencia, análise e historia acumulada de séculos de loita popular e anti-imperialista en Galiza e no mundo.

Recollemos pois a semente xa histórica do nacionalismo de esquerdas comprometido cun cambio de carácter revolucionario para Galiza.

Avogamos pola redistribución e reapropiación do salario e non polo traballo no contexto da precariedade. A precariedade, o paro e a emigración non poden ser as alternativas para a nosa xeración e para as xeracións futuras.

ADIANTE (Mocidade Revolucionaria Galega) asume como obxectivo estratéxico a construción dun Estado socialista como primeiro paso cara unha sociedade xusta e igualitaria, sen explotad@s nin explotadores, sen oprimid@s nin opresores, é dicir unha sociedade comunista.

Loitamos contra o patriarcado e a homofobia

ADIANTE (Mocidade Revolucionaria Galega) fai súa a causa revolucionaria da loita de liberación da muller. Loitamos contra o modelo patriarcal de sociedade, modelo perpetuador da opresión sobre a muller, contra o sexismo e a discriminación en todos os ámbitos da vida, no laboral, no persoal, no sexual... Pola igualdade absoluta e real entre homes e mulleres. É a obriga de todos os mozos e mozas defender posicións feministas baseadas en análises socialistas da nosa realidade.

Consideramos fundamental o respecto e a defensa das diversas orientacións sexuais dos individuos. Apoiamos as intervencións nas loitas dos colectivos de gais, transexuais, lesbianas e bisexuais.

Somos antiimperialistas e internacionalistas

ADIANTE (Mocidade Revolucionaria Galega) considérase parte da loita mundial antiimperialista e anticapitalista e como tal nos opomos ao reparto e saqueo económico do mundo por parte das potencias imperialistas e dos seus monopolios financeiros.

Mostrámonos en contra dos organismos que sirven para manter a dominación imperial-capitalista, como son hoxe en día a Unión Europea e OTAN. Loitamos activamente contra as agresións de todo tipo desencadeadas polo fascismo imperialista internacional, sexan baixo a excusa humanitaria ou baixo a bandeira da ONU. Denunciamos tamén o papel que xogan os exércitos que son na súa maioría instrumentos da oligarquía capitalista para a defensa dos seus intereses dentro e fóra das suas nacións.

ADIANTE (Mocidade Revolucionaria Galega) é unha organización internacionalista. Proclama a súa solidariedade con todos eses homes e mulleres que no mundo loitan polo socialismo e por liberar as súas nacións das mans da opresión e do colonialismo.

Tampouco se nos poden esquecer as forzas que contrarrestan ao imperialismo en xeral. Por iso amosamos a nosa especial solidariedade cos pobos de Iraq, Palestina, Colombia, Venezuela e Cuba. Tendemos a manter especiais relacións de fraternidade e solidariedade con outros movementos da mocidade que como o noso manteñan unha loita contra o Estado Imperialista Español (EIE) e en prol do socialismo.

Loitamos contra o colonialismo

Galiza segue a estar sometida a un expolio e a unha dependencia económica por parte do Estado Imperialista Español (EIE), o cal exerce unha opresión política e cultural sobre o pobo galego. Toda a nosa loita está enfocada a rachar con este sometemento co fin de acadar a nosa soberanía nacional e así xestionar racionalmente os nosos recursos económicos e naturais, así como exercer unha defensa efectiva da nosa cultura e lingua nacionais hoxe en retroceso debido ás políticas da Xunta. Exercemos unha denuncia constante das estruturas políticas impostas polo colonialismo (monarquía, constitución, estatuto, etc...).

Loitamos na defensa da Terra

Rexeitamos a destrución e a explotación dos recursos naturais resultantes do sistema capitalista que busca o lucro. Porque estamos fart@s de ser unha colonia onde se espolian as nosas riquezas e se destrúen os nosos montes, ríos e mares. Porque estamos fart@s de ver como no mundo o poder neoliberal espolia os recursos dos cidadáns.

Loitamos pola nosa cultura nacional

Defendemos a nosa Lingua e a nosa Cultura, hoxe en retroceso debido ás políticas de “bilingüismo harmónico” e o nulo interese en políticas de investigación, defensa e espallamento do noso patrimonio cultural e lingüístico por parte da anterior Xunta do Pp e tamén da actual do PsoE-BnG. Loitamos polo que nos é propio e apoiamos a todos aqueles pobos que ven como o que lles é propio desaparece.