A asociación sociocultural de intervención política Redes Escarlata, onda a asociación Arraianos (de Celanova), difusora dos valores sociopolíticos dos territorios da Raia Seca (ponte Galiza-Portugal), van desenvolver neste domingo 29 de agosto, a partires das 11:00 horas, unha homenaxe popular ao poeta nacional Celso Emilio Ferreiro, en Terras de Celanova.

Celso Emilio Ferreiro, cofundador do nacionalismo de clase galego, incansábel autor que puxo a súa voz e maila súa práctica da banda do Pobo Traballador galego vai ser conmemorado no 31º aniversario da súa morte, cun acto que se encetará no Cemiterio no que fica soterrado e que após as 12:00 horas continuará polas rúas da vila celanovesa coa execución por parte das Redes Escarlata da Acción Ferreiro, que acometerá unha defensa da obra do noso brillante autor ao tempo que denunciará o necesario carácter público do Mosteiro de Celanova, a piques de lles ser arrebatado aos veciños e veciñas da vila para lucro e gozo do capital turístico.

En memoria de Celso Emilio Ferreiro, na defensa do uso público do noso Mosteiro, vémonos en Celanova!

Como non podía ser doutro xeito, ADIANTE continúa a súa actividade axitativa durante o periodo estival. Cunha crucial Folga Xeral á vista, cos embates continuos aos nosos dereitos nacionais e á nosa lingua propia, cos montes a arder e cos crecentes ataques á mocidade asalariada, desempregada e estudante da clase obreira, non podemos permitirnos o luxo de baixar a garda. As conquistas da clase traballadora, que tanto esforzo e tantas vidas custaron, están a ser desmanteladas con luva branca e co apoio inestimábel de diversos mecanismos de alienación (modas, politización do deporte, tele-lixo,...), do consumismo e da represión. Unha represión de baixa intensidade, pero ben efectiva e calculada para nos someter á marxinalidade política.

Malia o acoso político-policial -especialmente grave na comarca viguesa con retencións, identificacións, roubo de material propagandístico e cacheos contra a nosa militancia- os disitintos Comités de Zona de ADIANTE están a saír ás rúas nestes días para difundir as consignas e propostas do noso programa. Así, a campaña de expansión A mocidade comunista pola independencia de Galiza. Organízate e loita!, que pasou a un segundo plano pola maior urxencia do chamamento á Folga Xeral, continúa a medrar en extensión á espera de voltar a ser reactivada con maior intensidade no Outono.

“A maior paifocada do século XX é o anticomunismo. […]

Efectivamente o anticomunismo fainos perder a libertade.”

Thomas Mann

Para a mocidade organizada en ADIANTE, a celebración do día nacional de Galiza, abre máis cuestións do que respostas. Nos estertores dunha celebración de dignidade, dunha nación como a galega que non se dá por derrotada, a reflexión sobre o actual marco xuridico-político e económico é unha necesidade de primeira orde.

Lonxe do determinismo e tamén lonxe das prácticas esencialistas tan extendidas que achegan visións erradas sobre a construción nacional galega e que tanto risco poñen nas arelas de transformación social, a mocidade traballadora galega ten por diante unha tarefa difícil: a de repensar o país, e abofé, a de repensar a clase.

Repensar a Nación dende o hoxe, non dista para nós da necesidade de repensar a clase traballadora como suxeito activo de calquera transformación posíbel. Iso é así xa cando a realidade sociopolítica desterrou as teorías dunha suposta “nova esquerda” que turrou por desactivar a resposta de clase a onde sempre deberan de estar: no poirento faiado das manifestacións ideolóxicas do Capital.

Desde ADIANTE, organización xuvenil comunista e independentista, apoiamos a convocatoria de cadea humana lanzada de novo polo organismo antirrepresivo Ceivar para este próximo 24 de Xullo en Compostela. Por terceiro ano consecutivo, a cadea humana popular terá lugar ás 19:00 horas na Praza de Galiza da nosa capital nacional.

Como organización xuvenil que somos, e a raíz dos debates da nosa 2ª Asemblea Nacional, nestes últimos meses estamos a chamar a atención sobre a situación de moitas/os mozas/os das clases populares nos chamados Centros de Menores, que na maioría dos casos non se distinguen moito das prisións convencionais feitas para os adultos.

Reivindicamos a liberdade para as/os presas/os políticas/os galegas/os independentistas, comunistas e antifascistas Maria Xosé Baños, Uxio Caamanho, Aurora e Carme Cayetano, Francisco e Xesús Cela, Iolanda Fernandez, David Garaboa, Xurxo García, Vitoria Gómez, Olga Oliveira, Mónica Refoxos, Xurxo Rodriguez, Xaime Simón e Inacio Varela, así como a liberdade definitiva para os independentistas Xosé Manuel Sanchez e Santi Vigo, aos que se lles quere obrigar a voltar a prisión en breve malia ter cumprido xa cadea.

A Central Unitaria de Traballadores/as (CUT) ven de convocar unha nova mobilización para HOXE (martes 29 de xuño) en Vigo, a manifestación sairá do cruce da Doblada ás 20 horas. As organizacións políticas, sociais e sectoriais que a adherimos facémola coincidir coa Folga Xeral convocada en Euskadi, onde LAB e ELA acumularon forzas conseguindo arrastrar ás bases de CCOO que vencellaron a esta central. Vaia por diante a nosa solidariedade coa clase traballadora basca.

ADIANTE chama á mocidade traballadora a botar a roldar os mecanismos de loita para un presente que garanta un futuro noso, e chama tamén á denuncia na rúa da entrega pacífica da clase obreira galega ao Capital. 

FOLGA XERAL,FOLGA XERAL!!

Este domingo 27, a AC Foucelhas, A Aldraba de Trazo, A Revoltosa de Montaos, A Revoltaina da Laracha, a Asociación Cultural Lucerna de Cerceda e o Sindicato Labrego Galego celebran, cunha serie de actos na antiga estación do camiño de ferro de Queixas-Lodoño (Xesteda, Cerceda), a conmemoración da proclamación da República Galega en Xullo de 1931.

Daquela, entre os días 25 e o 27 e en torno ao eixo Compostela-Ourense-Seabra, o movemento obreiro galego, apoiado tamén pola pequena burguesía galeguista e por independentistas chegados da emigración, propiciaron este fito histórico. Un fito histórico que, malia a súa brevidade, amosa que cando a clase operaria galega se bota ás rúas farta do maltrato e a aldraxe da metrópole española, as cadeas que unen Galiza co Estado Imperialista Español son ben febles.

Desde ADIANTE, como organización xuvenil nidiamente comunista, republicana e independentista, saudamos com ledicia esta iniciativa popular que, para alén de recuperar a memoria histórica común nacional-popular e de por un novo tixolo na obra da nosa construción nacional, marca unha nova xornada de reivindicación e de loita independentista e de clase. Adiante, sen tregua, pola REPÚBLICA SOCIALISTA GALEGA!